जन्म घ्या शिवराज

जगाच्या पाठीवर नाही झाला

राजा तुमाच्या-परी

अवतार घ्या महाराष्ट्रात

गरज आहे खरी

 

नाही उरले बाजी तानाजी

आणि त्यांचे संस्कार

युवा पिढी झालीय व्यसनाधिन

वाटतो त्यांचा धिक्कार

 

फुकनीसारखे मनगट घेऊन

राजे हे काय लढणार

मग सुराज्याची पताका

वर कशी काय चढणार

 

घ्या अवतार राजे

तालमींना महत्व येऊ दे

दणकट सारे शरीर यांचे

मनगट पोलादी होऊ दे

 

पिझ्झा बर्गर संस्कृतीतून

काढा यांना बाहेर

द्यायला शिकवा यांना

साडी चोळीचा आहेर

 

दुमदुमू देत पुन्हा महाराष्ट्रात

एकवीस तोफांचे आवाज

कनकनातून नाद येईल

जन्म घ्या शिवराज

जन्म घ्या शिवराज 

                   -बाळराजे

तुझ्या माझ्या आठवणी

आठविती आज  मला

तुझ्या  माझ्या आठवणी

तुझ्या माझ्या  माझ्या तुझ्या

तुझ्या माझ्या आठवनी  !!धृ!!

वेडावले, मन  असे

हरजागी तूच  दिसे

वेडावल्या माझ्या मना

का ग होती  भास  असे?

श्वासावरी तुझे  नाव  अन

ओठावरी तुझी गाणी…

आठविती आज  मला

तुझ्या  माझ्या आठवणी

तुझ्या माझ्या  माझ्या तुझ्या

तुझ्या माझ्या आठवनी   !! १!!

 

ये  ग राणी  परतुनी

तुझी माझी  साथ  जुनी

आठविता तुला  मग

डोळ्यामध्ये येते  पाणी

विसरावे तुला म्हणता

आठविसी क्षणोक्षणी

आठविती आज  मला

तुझ्या  माझ्या आठवणी

तुझ्या माझ्या  माझ्या तुझ्या

तुझ्या माझ्या आठवनी  !!२!!

 

सोडोनिया जाशी दूर

आसवांचा येतो  पूर

तू गं माझ्या सवें नसता

मना लागे हुरहूर

￰￰बोल माझे फुलराणी

येशील का परतुनी

आठविती आज  मला

तुझ्या  माझ्या आठवणी

तुझ्या माझ्या  माझ्या तुझ्या

तुझ्या माझ्या आठवनी  !!३!!

 

        ………बाळराजे…….

सोबत मला देशील ना?

होकाराची वाट पाहून

दमलोय मी आज

उगाचच चढवून ठेवलाय

तुझ्या स्वप्नांचा साज

 

प्राण आलेत कंठाशी

पाहतोय मी वाट

मला सहन करून दमलाय

नदीचा तो काठ

उत्तराची तुझ्या प्रिये

करतोय मी प्रतीक्षा

लवकर कळव होकार-नकार

का देतेस शिक्षा?

 

निराश मला करणार नाहीस

याची खात्री वाटतेय

नवनवीन आठवण तुझी

माझ्या मनात साठतीय

 

अधीर होऊन पाहतोय

तुझ्या उत्तराची वाट

नकोस तू डावलून जाऊ

मांडलेले हे ताट

 

शेवटी निर्णय तुझाच असेल

होकार मला देशील ना?

आयुष्याच्या सुंदर वाटेवर

सोबत मला देशील ना?

 

 ☺☺बाळराजे☺☺

असुडाचा घाव

रानी राबून-कष्टून

पिका नाही हमीभाव

ऐशोआरामे जगती

सारे रंक आणि राव

पोशिंद्याच्या पाठीवरी

परी असुडाचा घाव

 

पीक पिकवूनी सारे

घासावरी नाही नाव

घास दुसऱ्याच्या पोटी

घेत मिशिवरी ताव

पोशिंद्याच्या पाठीवरी

परी असुडाचा घाव

 

हतबल मग होवोनी

घेई शासनाला धाव

सत्ताधारी मग म्हणती

हा विरोद्यांचा असे डाव

पोशिंद्याच्या पाठीवरी

परी असुडाचा घाव

 

त्याच्या डोळ्यात आसवे

नसे भविष्याला ठाव

चला देऊ त्याच्या पीका

मिळवुनी हमीभाव

पोशिंद्याच्या पाठीवरचा

रोखु असुडाचा घाव

——– *बाळराजे*————